#ReboNyunda: Panen Hileud

Dua minggu katukang, di tangkal Kananga pipireun rorompok abdi seueuuur hileud keketan, seueur pisan. Barudak nu ngeprin di Sakola Printing dugi ka ngetangan eta hileud ti katebihan, mung ukur ngintip ti jendela –maklum da teu wantuneun ningali caket-caket mah. Haha-. Saurna mah aya sekitar 20-an hileudna. Pastina mah duka sabaraha da lieur ngetangna, warna hileudna sami sareng daunna sih. Ieu mah paneun hileud namina euuy :D

WARNING!! Nu jiji ningali hileud mending tong ningali poto-poto di handap ieu, tong neraskeun maca seratan ieu. Haha peace! :P

Eta nu moto hileudna Ibank. Saleresna mah Ibank sieuneun pisan ka hileud. Malah abdi nu teu sieun, abdi malah resep ka hileud. Tibalik nyaa… Aya ge pameget nu kedahna teu sieunan ka hileud, ieu malah istri :P Ibank moto hileudna ge bari pipirindingan jijieun. Haha.. Hadena gaduh kamera SLR lensa tele, janten tiasa moto ti katebihan. Eta moto hileud ge ti jarak kirang langkung 4 meteran, tapi hileudna tiasa kapoto jelas pisan. Hebat emang nya teknologi, nu sieuneun ka hileud jeung sajabina kabantosan. :D

Eh enya, aya carita tentang abdi sareng hileud.

Ti kapungkur, ti SD keneh, abdi resep pisan ka hileud. –aneh emang, batur mah nyebat hileud teh jiji, saur abdi malah lucu, duka atuh kunaon da nu namina resep sih kumaha :D- Saking resepna, pernah nuju kelas 6 SD abdi ngingu hileud di rorompok. Abdi panasaran hoyong terang kumaha prosesna hileud robih janten kupu-kupu. Harita teh abdi ngingu 3 hileud. Hiji warna hideung aya totol koneng di luhurna, ageungna sahandapeun hileud keket nu di poto. Hiji hileud keket nu sapertos di poto. Hiji deuina hileud tangkal palem, warna hejo ngora herang, luhurna aya garis konengan sareng aya tandukan huluna, hileud palem mah alit.

Abdi ngingu hileudna susulumputan, da sieun diseuseulan ku si mamah, sabab mamahna sieuneun pisan ka hileud sih. Haha.. Ku abdi hileud-hileudna diwadahan ka toples, 3 toples nu benten. Luhurna ditutupan ku palastik, tapi dibolongan aralit palastikna, ditojos ku nyere tea geuning, eta supados hileudna tiasa bernapas. Teras di lebet toplesna ku abdi dipasihan batang sareng daun tempat hirupna si hileud. Biasana ku abdi daunna digentos unggal dinten. Kunaon digentos? Sabab kahiji nya pedah seep diemaman ku si hileud, kadua nya supados daunna angger seger sangkan hileudna betah di kandangan. Mmm… saleresna mah karunya sih ngandangan hileud, tapi da ku panasaran tea hoyong ningal kepompong sareng kupu-kupuna. Hehe.. Pami di tangkal mah pan moal tiasa ningali nya. Paling ge tiasa ningali dugi ka janten kepompong wungkul meureun. Da pami tos janten kupu-kupu mah ke na langsung hiber.

Sanaos susulumputan, angger weh lami-lami mah si mamah terangeun abdi ngingu hileud. Bet si mamah ngajerit jijieun. Hahaha… Teras si hileudna piwarang dipiceun. Tapi pedah abdina keukeuh alim miceun eta hileud, janten si mamah ngelehan. Saurna wios tapina disimpenna di luar, di pipireun bumi, teu kenging di lebet bumi komo di tempat nu bakal katingal ku mamah.

Kira-kira 2 minggonan ngingu 3 hileud, hasilna nyaeta:

Hileud hideung berhasil janten kupu-kupu. Kupu-kupuna ge sami hideung aya corak konengan. Saee teh ih pami ningali mah. Hanjakal kapungkur mah can gaduh hp nu aya kameraan nya, teu gaduh potona deh.

Hileud keket ku abdi dikaluarkeun deui, disimpen deui ka tangkal Kananga. Sabab hileud keket mah taina arageung baruleud, sering deuih miceunna. Janten si toples teh pinuh weh ku tai. Mending pami teu bau mah, ieu mah bau. Abdina jiji ongkoh kedah mersihan tai unggal dinten mah. Hehe.. Teras duka kunaon, hileud keketna warnana robih janten semu hideung kitu. Ukuran bandanna ge asa ngaalitan. Abdi kan karunya.. Nya ntos weh si keket mah dikaluarkeun deui. Ditambih deuih si keket mah disimpen di panangan teh sok sesah dileupaskeunna, ngeket pisan. Sapertos lintah meureun tah kitu. Abdina janten rada sieun nyonyoo hileud keket deui dugi ka ayeuna, sieun sesah nyopotkeunna. Paingan namina hileud keket nya.. Da emang ngeket pisan.

Hileud palem ge ku abdi dileupaskeun deui. Sabab pami tos nyonyoo hileud palem di panangan, ke na teh pananganna sok bau. Teras tapak lengkah si hileud palem sok aya ciga sawangan kitu, bodas sagaris. Duka apa ti tapak eta nu bau teh apa timana..

Ayeuna mah abdi tos tara ngingu hileud deui. Nambihan saurang sih nu sieuneun ka hileudna. Boa-boa ke abdi nu dikeroyok ku mamah sareng Ibank. Hahaha :P

Kenging. Si Famysa, hileud lovers :D